Þriðjudagur 7. nóv. kl. 20:00
  Hefðbundinn bæjarmálafundur

verður haldinn fyrsta þriðjudag í nóvember, þann 7. 11. 2006 kl. 20:00 á Gistihúsinu á Egilsstöðum.

Fjölmennum !

Með kveðju,

f.h. stjórnar.  Helga Hreinsdóttir
 
© 2006 Héraðslistinn
 
 
Ertu með spurningu?
Því miður urðum við að fjarlægja innsláttarform héðan af síðunni, þar sem inn í þau streymdi rusl utan af netinu í stríðum straumum. Viljir þú koma spurningu á framfæri er best að snúa sér til stjórnar Héraðslistans, en hana skipa Skúli Björnsson, Helga Hreinsdóttir, Ásmundur Þórarinsson, Baldur Pálson og Sigrún Blöndal.
 
Hvað segja lesendur ? 
Dagsetning: 09. 11. 2006 / Spyrjandi: Sigurður Ingólfsson
Sæl öll.
 
Er einhversstaðar í batteríinu rætt um
félagsheimilis/samkomuhúsamál ?
Bara að forvitnast.
 
Kveðja,
Siggi
 
Dagsetning: 10. 09. 2006/ Hver svarar:
 
Dagsetning: 09. 09. 2006 / Spyrjandi: Tjörvi Hrafnkelsson
Ég er með spurningu varðandi styrki sveitarfélagsins til íþrótta og tómstundamála. Eftirfarandi klausur eru teknar úr stefnuskrám Héraðslistans og Sjálfstæðisflokksins, sem mynda meirihlutann:

Úr stefnuskrá Héraðslistans:
“Styrkir vegna íþrótta- og
tómstundastarfs barna upp að 16 ára
verði tryggður til að auka enn frekar
þátttöku barna í íþrótta- og
tómstundastarfi.”

Úr stefnuskrá Sjálfstæðisflokksins.
“Sveitarfélagið styrki enn frekar
þátttöku barna, 18 ára og yngri í
íþróttum og/eða tómstundum, með
20 þúsund króna framlagi árlega á
hvern iðkanda vegna íþróttaiðkunar.
Samningurinn taki gildi ekki síðar en
um áramótin 2006-2007.”

Hér virðist ekki bera mikið í milli þannig að ég spyr: hvernig hljómaði bræðingurinn í málefnasamningnum? Og hver er staða þess í kerfinu í dag?
Dagsetning: 10. 09. 2006/ Hver svarar: Jónína Rós Guðmundsdóttir
Sæll Tjörvi ! Takk fyrir spurninguna.
Í málefnasamningi er gert ráð fyrir 20.000.- kr. styrk pr. barn eftir því sem ég best man. Þetta er háð nýju fjárhagsári og ég geri bara ráð fyrir því að þetta taki gildi frá áramótum.
Kær kveðja Jónína Rós
Dagsetning: 17. 05. 2006 / Spyrjandi: Tjörvi Hrafnkelsson
Sem starfsmaður í upplýsingatæknigeiranum þá hef ég orðið þess var síðustu misseri að þegar kemur að upplýsingatæknimálum hjá sveitarfélaginu, þá virðist fókusinn vera sá að leita helst ekki til fyrirtækja sem eru búin að koma sér fyrir á staðnum, þegar kemur að nýjum verkefnum. Þar sem atvinnumál eru gjarnan stór hluti uppbyggingu samfélags þá undrast ég mjög þessa afstöðu, sérstaklega í ljósi þess að hér eru fyrirtæki með mikla þekkingu og reynslu til að takast á við slík verkefni.

Nú er Héraðslistinn í meirihluta í bæjarstjórn og því spyr ég tveggja spurninga:

Er það meðvituð stefna núverandi meirihluta að leita ekki til þekkingarfyrirtækja sem eru með starfsemi á Héraði?

Og í framhaldi af því kalla ég eftir stefnu listans í upplýsingatæknimálum hjá Sveitarfélaginu?
Dagsetning: / Hver svarar:
Hvað segja lesendur ? 
Dagsetning: 14. 05. 2006 / Spyrjandi: Margrét Árnadóttir
Sæl öllsömul og til hamingju með heimasíðuna. Er að spá hvort menn viti almennt ekki af henni, þurfi að auglýsa hana, miðað við hve lítið er um spjall á henni. Jæja best að koma sér að efninu, það eru málefni eldri borgara og þá er ég að tala um fólk sem er orðið eitt, jafnvel einmanna, þarfnast þjónustu, er að mestu sjálfbjarga með daglegar athafnir klæðast og matast en er samt ekki orðið það veikt að þurfa að vistast á sjúkrahúsi. Er einhversstaðar eitthvað að gerast varðandi uppbyggingu Elliheimilis, þar sem hægt er að bjóða fólki upp á mannsæmandi aðstæður húsnæðislega séð?
Er verið að vinna í því að eldri borgarar geti keypt sér matarbakka um helgar líka?
Ég held að það sem öldruðum er boðið upp á hér megi stórbæta án þess að þurfta að bíða lengi og vildi ég sjá loforð um eitthvað ákveðið í þeim málum fyrir næsta kjörtímabil ekki bara einhver orð sem lögð eru á blað og svo gerist ekkert nema vandræðagangur því það virðist ekki vera til land undir elliheimili, og ef það finnst er hægt að stoppa vinnu vegna þess að það skyggir á útsýni úr ákveðnum húsum. Ef allir íbúar Egilsstaða hefðu alltaf haft val um það að ekki mætti byggja hús við hliðina á þeim vegna skugga og útsýni væri spillt væri þar bara ein aflöng gata.
Þetta er skrifað til að fá umræðuna á stað og vegna þess að nú er búið að taka stöðuna út, þarfir og fleira sem engum dylst að eru miklar varðandi byggingu með þjónustu f. eldri borgara
Dagsetning: 15. 05. 2006 / Hver svarar: Katrín Ásgeirsdóttir
Sæl Margrét, ég  þakka spurningarnar.
Mér er kunnugt um að á kjörtímabilinu, sem nú er að líða, að mjög vel hefur verið fylgst með málefnum aldraðra.  Nú þarf  að byggja upp fleiri sambýli og færa þjónustu hjúkrunarheimilis til nútímalegs horfs. 
Í dag stendur eldri borgurum til boða öll almenn þjónusta á vegum
Félagsþjónustunnar, svo sem félagsleg ráðgjöf, félagsleg heimaþjónusta og heimsending matar á Egilsstöðum og Fellabæ.  Auk þess er rekin dagvist og félagsstarf fyrir eldri borgara.
Stefnumál Héraðslistans í málefnum aldraðra eru m.a. að boðið verði upp á heimsendingu matar alla daga vikunnar, jafnt í dreifbýli sem í þéttbýli og að liðveisla og önnur þjónusta við þá  sem búa heima verði aukin.
Hvað segja lesendur ? 
Dagsetning: 14. 05. 2006 / Spyrjandi: Tjörvi Hrafnkelsson
Hver er afstaða Héraðslistans til uppbyggingar á sérútbúinni fimleikaaðstöðu?

Skilgreining á sérútbúin fimleikaaðstaða, er húsnæði með fimleikaáhöldum sem ekki þarf að taka saman eftir notkun og sértækri aðstöðu eins og gryfju.
Dagsetning: 12. 05. 2006 / Hver svarar: Árni Ólason
Héraðslistinn tekur að sjálfsögðu vel í allar hugmyndir sem snúa að því að bæta íþróttaaðstöðu í sveitarfélaginu og þá eru fimleikar þar ekki undanskildir. Fimleikadeildin er okkar næst stærsta deild með um 170 - 180 iðkendur og þar er unnið gott og metnaðarfullt starf eins og reyndar víðar innan vébanda Hattar.

Þessar hugmyndir eru því verðar allrar skoðunar. Þetta er hins vegar hugmyndir sem við höfum hvorki séð útfærslu á né heldur verðmiða og öll sú umræða á því eftir að líta dagsins ljós. Það er þó ljóst að samkvæmt þeim hugmyndum sem aðilar innan fimleikadeildar hafa skoðað þá er um talsverða fjárfestingu að ræða eða eitt stykki íþróttahús með sérhæfðum föstum búnaði sem myndi nýtast þessari einu deild fyrst og fremst.

En allt er þetta  spurning um forgangsröðun á fjármagni sem alltaf er jú skortur á.
Hvað segja lesendur ? 
Dagsetning: 11. 05. 2006 / Spyrjandi: Jörundur Ragnarsson
Velti aðeins fyrir mér stuðningi listans í gerð jarðganga á Mið-Austurlandi, þ.e milli Eskifjarðar-Norðfjarðar-Mjóafjarðar-Seyðisfjarða og Héraðs.
Dagsetning: 12. 05. 2006 / Hver svarar: Skúli Björnsson
Hugmyndin er stórkostleg og myndi efla miðausturland gífurlega sem eitt þjónustu- og atvinnusvæði.  Tel sjálfsagt að sveitarfélagið  komi að stofnun félags sem byggði og sæi um rekstur þessara mannvirkja að einhverju eða öllu leyti.  Á hinn bóginn tel ég mjög mikilvægt að þessi framkvæmd skerði ekki fjármagn til að ljúka núverandi hringvegi né öðrum brýnum samgöngubótum í fjórðungnum.
Hvað segja lesendur ? 
Dagsetning: 09. 05. 2006 / Spyrjandi: Benedikt V. Warén
Lagarfljótsormurinn er eina farþegaskipið sem rekið er á vatni á Íslandi,  rekstur þess hefur verið erfiður frá upphafi.

Hvað hefur Héraðslistinn hugsað sér að gera....:
1. ...í hafnarmálum á Egilsstöðum og Atlavík?
2. ...í að aðstoða eigendur, svo reksturinn lognist ekki útaf?
3. ...í að þrýsta á ríkisvaldið að breyta lögum og gera þau minna íþyngjandi fyrir þennan rekstur?
Dagsetning: 12. 05. 2006 / Hver svarar: Baldur Pálsson
Heill og sæll Pelli.

Varðandi eftirfarandi þrjár spurningar þínar um Lagarfljótsorminn og skyld mál, er þetta helst að segja af stefnu Héraðslista um þau mál:

1. ...í hafnarmálum á Egilsstöðum og Atlavík:
Héraðslistinn mun áfram standa að því að hér geti komið ásættanleg hafnaraðstaða fyrir ferðaþjónustu, sport og
tómstundastarf.

2. ...í að aðstoða eigendur, svo reksturinn lognist ekki útaf:
Núverandi meirihluti bæjarstjórnar hefur fylgst vel með núverandi rekstri Lagarfljótsormsins og hefur átt farsæl samskipti
við forsvarsmenn fyrirtækisins. Héraðslisti mun kappkosta að viðhalda þessu samráði áfram.

3. ...í að þrýsta á ríkisvaldið að breyta lögum og gera þau minna
íþyngjandi fyrir þennan rekstur:
Héraðslisti mun ekki skorast undan aðstoð við að þrýsta á ríkisvaldið varðandi lagabreytingar vegna ferjusiglinga á
vötnum, enda hefur oddviti listans komið að svipuðum málum varðandi björgunarskip sem ekki var hægt að skrá eða reka
hér á landi vegna laga sem björgunarskipin voru látin falla undir en áttu alls ekki við björgunarskip.

Kveðja Baldur
 
Hvað segja lesendur ? 
Dagsetning: 08. 05. 2006 / Spyrjandi: Benedikt V. Warén
Mörg stór og framsækin bæjarfélög hafa árlega tilnefnt bæjarlistamann og þannig var einnig með Austur-Hérað, þegar sveitarfélagið af myndarskap slógust í hóp þeirra sem það gerðu.
Þegar þessi gjörningur var lýðnum ljós, töldu margir þetta vita á meira en orðið hefur.

Hver er stefna Héraðslistans í þessu máli?
Dagsetning: 08. 05. 2006 / Hver svarar: Jónína Rós Guðmundsdóttir
Takk fyrir spurninguna.
Bendi þér hér á punkt úr stefnuskrá okkar sem þú getur skoðað betur á heimasíðunni okkar, vona að þar sé komið fullnægjandi svar.

Valinn verði bæjarlistamaður annað hvert ár og /eða nýútskrifuðu listafólki af Austurlandi gefinn kostur á að vinna að skapandi verkefni á Fljótsdalshéraði. Markmiðið er að auka áhuga íbúa á listum og styrkja ímynd sveitafélagsins sem menningarsamfélags

Kær kveðja Jónína Rós
 
Hvað segja lesendur ? 
Dagsetning: 07. 05. 2006 / Spyrjandi: Þórunn Hálfdanardóttir
Hvers konar framboð er Héraðslisti og hvernig vinnur hann ?
Dagsetning: 07. 05. 2006 / Hver svarar: Baldur Pálsson
Að bakhjarli hefur þetta framboð með sér félag sem heitir, Samtök félagshyggjufólks á Fljótsdalshéraði – Héraðslisti. Félagið hefur sett sér skýr og einföld lög og í fyrstu þremur greinum laganna kemur fram, heiti, markmið og félagsaðild.

1. grein.
Félagið heitir Samtök félagshyggjufólks á Fljótsdalshéraði – Héraðslisti.
Heimili þess og varnarþing er á Egilsstöðum.

2. grein.
Markmið félagsins er að styðja við og bjóða fram lista félagshyggjufólks til sveitarstjórnar. Einnig að halda uppi öflugri umræðu og þátttöku í mótun samfélags á Héraði til framtíðar.

3. grein.
Félagi getur hver sá orðið, sem orðinn er 16 ára og hefur búsetu á Fljótdalshéraði.

Hér segir að félagið er óbundið og óháð pólitískum öflum á landsvísu, sem þýðir að allir sem taka sæti á listanum eru frambjóðendur listans. Ekki fulltrúar einhvers flokks. Það er einkamál hvers og eins hvort hann er flokksbundinn eða utan flokka.

Félagið heldur bæjarmálafundi einu sinni í mánuði fyrir félagsfólk sitt og koma þar formenn nefnda og ráða og upplýsa hinn almenna félagsmann um gang hvers málaflokks fyrir sig. Með þessum bæjarmálafundum hefur félaginu tekist að standa undir höfuðtilgangi félagshyggjunnar að upplýsa hinn almenna félagsmann, þannig að þeir geti fylgst með og svarað fyrir gerðir framboðsins.
Þá eru þetta mikilvægir fundir til að efla félagsheildina og fylkja henni saman ef óvænlega horfir í bæjarmálum, en líka til að gleðjast þegar vel gengur.
Hvað segja lesendur ? 
   

upp ı til baka
 
Kosningaskrifstofa: Nían • Miðvangi 1 • Egilsstöðum • sími: 471 2628 • xlaust@simnet.is